RBK tapaði örugglega fyrir Lyon

Við Deeppal skelltum okkur á UEFA CHAMPIONS LEAGUE í kvöld. Rosenborg Ballklub atti kappi við margfallt franskt meistaralið Olympique Lyon. Andrúmsloftið var rafmagnað og stemningin frábær og leikurinn alger thriller:) Rosenborg átti nokkrar góðar sóknir en Lyon stjórnaði leiknum frá A-Ö og var brasilíski galdramaðurinn Juninho hreint út sagt brilliant. Varnarmaðurinn Cris skoraði sigurmark Lyon nokkrum sekúndum fyrir hlé:/ Te og pylsa í hálfleik virtist ekki færa okkur meiri lukku en svo að Rosenborgarar voru heppnir að sleppa með 0-1 tap. En þetta var frábær upplifun og myndirnar hér segja meira en mörg orð:

Rétt fyrir leik. Trefillinn á sínum stað

Deeppal var að fara á sinn fyrsta "alvöru" fótboltaleik:)

Juninho stillir miðið fyrir eina af sínum eitruðu spyrnum

Rosenborg bullurnar. Styðja sitt lið í gegnum súrt og sætt

Houllier sjálfur. Halli ég tók þessa fyrir þig, ég veit að þú ert svo mikill aðdáandi;)

Hverskonar leiðtogi?

Ég tók þetta leiðtogapróf sem ég rakst á á bloggsíðu Gauja. Þeir reiknuðu mig út sem JFK, ekki slæmt það en ég vona nú að örlög mín og ævi verði aðeins lengri og gæfuríkari. Ég sá að Gauji var reiknaður út sem Hitler, maður þarf því greinilegar að passa sig honum í framtíðinni:)

What Famous Leader Are You?
personality tests by similarminds.com

Klukk

Jæja skyldan kallar. Ég var víst klukkaður og það þýðir bara það að ég verð að segja 5 lítt þekktar staðreyndir um sjálfan mig. Ég velti nú dálítið fyrir mér "lítt þekktar" staðreyndir? Það fer nú bara eftir því hver á í hlut. En jæja mér er ekki til z-unnar boðið lengur:

1. Þegar ég fæddist þá átti ég 2 ömmur, 2 afa, 4 langömmur, 2 langafa og 1 langalangafa
2. Ég hata sveppi (en þeir eru þó ágætir á pizzum)
3. Ég er með tölvuleikja-áráttu. Á enn í dag erfitt með að slíta mig frá tölvuleikjum ef ég byrja að spila þá. Besta ráðið er því að hafa þá ekki til staðar.
4. Ég byrjaði starfsferil minn 3 ára (+/- 1 ár?) gamall í saltfiskverkun ömmu og afa á Ólafsfirði:) Sagan segir að ég hafi verið mjög kröfuharður starfsmaður og hafi viljað fá útborgað í beinhörðum peningum á klukkutíma fresti á meðan ég var í vinnunni (snemma beygjist krókurinn). Ekki fylgdi þó sögunni að mín helsta iðja í vinnunni var að bera sand úr sandkassanum inn á vinnslugólfið:/
5. Ég elska ýsu í raspi (að hætti mömmu). Ég þarf bara að fara að læra að malla hana sjálfur:/

Jæja Ilmur, þá er það komið. Mér sýnist nú flestir virkir bloggarar sem ég þekki vera búnir að taka þátt í þessum leik þannig að ég segi bara stop hér. Enda viljum við nú ekki fara að búa til óendanlega lykkju? Vona að þið þekkið mig miklu betur nú en áður:)

Álbræðsla??? Hvað er nú það?

Ég sá í dag frétt á www.mbl.is um mótmæli "umhverfisverndarsinna" á fyrirhuguðum stækkunum álverana í Straumsvík og á Grundartanga. Ég var nú ekki mikið að kippa mér upp við þessa frétt en ákvað að lesa hana nánar og sjá hvað þarna færi fram.
Og lesturinn var svo sannarlega athyglisverður svo að vægt sé til orða tekið. Þar mátti m.a. finna eftirfarandi:

• "...neikvæðum og heilsuspillandi áhrifum sem álbræðsla og tengd vinnsla hefur..."
• "Þessi alþjóðlega ráðstefna er að hluta til fjármögnuð með skattpeningum okkar – en Reykjavíkurborg, Iðnaðarráðuneytið, Iðntæknistofnun og Landsvirkjun eru meðal fjárstuðningsaðila og þátttakenda - þar sem Ísland er enn boðið til sölu sem ódýrt málmbræðsluland og „óæskileg sjónarmið“ ekki velkomin"
• "...Við sættum okkur ekki við að Faxaflóasvæðið verði eitt mengaðasta svæði Norður-Evrópu, en það mun verða staðreyndin ef af þessum áformum verður."
• "Einnig viljum við sýna samstöðu því fólki sem orðið hefur fyrir barðinu á siðlausum og ómannúðlegum vinnubrögðum Alcan um víða veröld; allt frá verkamönnum í Straumsvík sem samband hafa haft við okkur og lýst óviðunandi vinnuumhverfi og brotum á réttindum starfsmanna; ..."

Ég hef sjálfur starfað hjá Alcan í Straumsvík og er að sérhæfa mig í verkfræði léttmálma þessa stundina og þessvegna verð ég bara leiðrétta jafn augljósar staðreyndavillur og komu fram hér að ofan.

Á Íslandi fer aðeins fram rafgreining á bauxíti og við það verður til fljótandi ál. Rafgreining er í eðli sínu mjög mengandi ferill og gefur frá sér brennisteins- og flúorgas sem er mjög óæskilegt umhverfinu. Í Íslenskum álverum náum við að hreina um 99,9% af flúornum úr gasinu sem fer út um strompana. Ekki eru neinar reglur um brennisteinsmengun og því er hann ekki hreinsaður. Hins vegar er brennisteinsgas þess eðlis gætt að það dreifist mjög hratt með vindum og því er lítil staðbundin mengun að völdum þess. Ekki er hægt að hreinsa brennisteinsgasið nema með vothreinsistöðvum sem setja brenninsteinninn þá út í sjóinn og það hlýtur að vera mjög óæskilegt fyrir okkur Íslendinga að setja mengunarefni í sjóinn.

Álbræðsla er eitthvað sportorð sem sumir nota í viðtölum og blaðagreinum til að undirstrika eitthvað neikvætt. Að mér vitandi er engin álbræðsla starfandi á Íslandi og ekki stendur til að byggja neina. Álbræðsla er verksmiðja sem tekur álklumpa, t.d. gamlar bjórdósir og umbúðir, og bræðir það upp og steypir nýjar vörur. Þessi aðgerð gefur ekki frá sér nein spilliefni og er því mjög umhverfisvæn og því mætti segja að Álbræðsla sé starfsemi sem allir umhverfissinnar ættu að fagna.

Skattpeningunum okkar finnst mér dálítið fyndið í þessu samhengi. Þetta ágæta fólk hefur örugglega ekki hugmynd um hversu miklum skattpeningum eitt stykki álver skilar inn í þjóðarbúið. Sú upphæð hleypur á mörgum milljörðum á ári:)

Eitt mengaðasta svæði Evrópu. Hvaða rannsóknir sýna það? Ætli það sé þá ekki bílaumferðinni í Reykjavík að kenna frekar en iðnaðinum? Samskonar svæði og þetta er víða að finna hérna í Noregi og það er ekki að sjá að það sé nein mengun hérna. Í bænum Mosjoen sem er norður af Þrándheimi er meira að segja Söderbergálver inn í miðjum bænum (við getum nú þakkað fyrir að hafa ekki slík álver á Íslandi).

Svo get ég nú ekki annað en tekið upp hanskann fyrir minn fyrrum vinnuveitanda Alcan. Það sem ég þekki til hjá Alcan eru mikill metnaður í öryggis- og vinnuverndarmálum og fyrirmyndar framkoma við starfsfólk. Þetta sést best á því að starfsaldur í Straumsvík er með því hæsta sem gerist á Íslandi. Hversvegna ætti fólk að vinna svona lengi hjá þessu fyrirtæki ef það væri brotið á réttindum þess og vinnuaðstaðan væri óviðunandi?

Þegar ég kíkti inn á heimasíðu þessara "umhverfisverndarsinna" sá ég að þetta er einhver félagsskapur sem hefur augljóslega litla þekkingu á þeim málefnum sem mótmælt er. Mér finnst þetta mjög sorglegt að hópur sem þessi kemst upp með að nota hið almenn orð "umhverfisverndarsinnar" um gjörðir sínar. Ég skola mjólkurfernurnar heima og set þær í endurvinnslu. Ég hef aldrei átt bíl. Ég flokka ruslið sem ég sendi frá mér. Mér þykir mjög vænt um umhverfi mitt eins og líklega flestu skynsömu fólki og tel mig því til umhverfissinna. Fólk sem er á móti virkjunum og álverum getur notað miklu betri rök heldur en þessi sem komu fram í þessari grein, rök sem byggjast á réttum staðreyndum og skynsemi. Það er að sjálfsögðu gott að fólk hafi skoðanir á þessum málum, hvort sem þær byggjast á eigin hagsmunum eða tilfinningum.

Þar sem ég hef mun meiri áhyggjur af loftmengun jarðar, heldur en staðbundnum "náttúruspjöllum" á Íslandi, þá held að það sé mun umhverfisvænna að framleiða hinn græna málm(sem álið er eftir að það er búið að rafgreina það úr Bauxíti) með hreinni orku á Íslandi heldur en með olíu- eða kolaorkuverum í USA eða Kína. Auk þess er þetta auðveldasta leiðin fyrir okkur til að nýta náttúrauðlindir okkar á skynsaman hátt og afla þar með fjár til hagsbóta fyrir land og þjóð:)

The end.

Þekking, tími og peningar???

Nú er ég loksins búinn að ná þessu...

Þekktar kenningar segja eftirfarandi: " Verkfræðingar og raunvísindamenn geta aldrei fengið jafn vel borgað eins og framkvæmdastjórar, sölustjórar, endurskoðendur, lögfræðingar og sérstaklega forystumenn í hugvísindum og stjórnmálum.
Nú hefur verið fundin leið til að styðja þessar kenningar með stærðfræðilegum hætti sem byggir á eftirfarandi tveimur frumforsendum:

• Forsenda 1: Þekking er afl - (e. Knowledge is Power)
• Forsenda 2: Tíminn er peningar - (e. Time is Money)

Verkfræðingar vita að: afl = vinna / tíma - (e. Power = Work / Time)

Því fæst: þekking = afl

sem jafngildir: þekking = vinna / tíma

og tími = peningar,

leiðir til: þekking = vinna / peningar

Ef leyst er út úr jöfnunni fyrir peninga, þá fáum við:

peningar = vinna / þekking

Útfrá þessu sést að þegar þekkingin stefnir á núll, þá nálgast peningar óendanlegt, óháð því hversu mikil vinna er unnin:)

og hana nú...

Í nám(um) í Noregi

Hér ber að líta mynd frá ferð erlendu M.Sc. nemanna í koparnámu- bæinn Röros sem er staðsettur í um 500 m hæð í fjöllunum hér suður af Trondheim. Eins og sjá má þá var ég eini hvíti maðurinn í ferðinni fyrir utan leiðsögukonuna og bílstjórann:/ En það er bara hið besta mál. Náman sem við skoðuðum er um 300 ára gömul og er að flatarmáli ca. 21 fótboltavöllur, þ.a. það var eins gott að villast ekki þarna inni í þessu völundarhúsi. Á einum staðnum var stór salur með sviði og sætum og þar tóku 3 strákar frá Ghana lagið með tilheyrandi hrópum og köllum og miklum rythma, minnti bara á African Sanctus tónleikana hjá Háskólakórnum síðasta vetur:)
(sjá fleiri myndir frá Röros á myndasíðunni)

Glænýja sjónvarpið mitt er bilað og ég veit ekkert hvað er að gerast með það. Held að það sé eitthvað fúllt út í mig yfir því að ég nenni aldrei að horfa á það og sé í staðin alltaf að horfa á aðalkeppinaut þess, tölvuna;) Ég hafði samband við Best-Buy og þeir ætla að koma í vikunni og sækja það og láta mig fá nýtt tæki í staðin, no problemo.

Svo var ég að taka að mér að skrifa pistil í tímarit SÍNE (samband íslenskra námsmanna erlendis) um dvöl mína hérna í Noregi. Ritstjórinn er sama kona og ég fór í viðtal til þegar ég var að sækja um námsstyrkinn. Hún hafði svo samband við mig og bað mig um þetta og ég held að Trygve (my Course Coordinator) deildarformaðurinn okkar muni líka skrifa eitthvað í blaðið í tengslum við þennan pistil og segja sitt álit á þessu samstarfi skólans við íslenskan iðnað...

Svo er ég að fara í enn eitt matarboðið á föstudaginn til Alberts. Þar sem hann er Singaphur kínverji þá ætlar hann að elda eitthvað genuine kínverskt og svo verður eitthvað gott að drekka með. Alltaf gaman að smakka svona alvöru framandi mat og góð tilbreyting frá frostnu og fljótlegu tilbúnu réttunum sem ég borða alltof mikið af:/

I'm a legal alien

But not an Englishman in New York. Eftir 24 og hálft ár með sömu kennitöluna þá hef ég ákveðið að fá mér aðra, gott að eiga eina svona til vara. Ég fékk sem sé póst frá norsku þjóðskránni í dag um að ég væri formlega löglegur íbúi Noregs og var því úthlutað Födelsnummer 030481 23359. Glæsilegt ekki satt? Svo er ég kominn með norskt GSM númer hvorki meira né minna (0047) 938 13 834. Það er því ekki hægt að segja annað en að ég sé búinn að koma mér vel fyrir.

Gleðifréttirnar í dag eru þær að miðar á Rosenborg - Lyon 28. sept eru komnir í hús:) Við Deeppal keyptum tvo miða á svarta markaðnum bara til að tryggja að við kæmumst á einhvern leik í vetur. Verðið verður ekki gefið upp hér en það er þó mun lægra á þennan leik en á Real Madrid leikinn í nóvember. Við höfum heyrt tölur sem eru vel á þriðja tug þúsunda, of mikið fyrir fátæka námsmenn.

Gangið hægt um gleðinnar dyr um helgina:)

Enn meira fótboltafár eftir sigur Rosenborg

Já það var um fátt annað talað í dag í Þrændarlögum en 3-1 sigur Rosenborg gegn Olympiacos í Aþenu í gærkveldi. Menn horfðu á leikinn í öllum sjónvarpstækjum borgarinnar í gær og úrslitin eru svo sannarlega óvænt því að því er ég best veit þá er þetta fyrsti útisigur Rosenborg í meistaradeild Evrópu. Þetta hleypir mikilli spennu í riðilinn okkar og því enn meiri ástæða til að redda sér miðum á leikina þrjá hér í vetur sem ætti að vera góður möguleiki.

Við höfum sem betur fer ekki fengið að finna fyrir þessu óveðri sem hefur gengið yfir Bergen undanfarna daga og kostað mannslíf í aurskriðum. Samt sem áður hefur ekki verið þurr dagur hér í Þrándheimi í ca. tvær vikur og veðrið hefur verið frekar leiðinlegt og óvengulega slæmt á þessum tíma að því er Nojararnir segja. En þetta er í lagi á meðan það byrjar ekki að snjóa.

Ég mun fara í dagsferð til námubæjarins Röros á laugardaginn með masters-nemunum hér við NTNU. Áætlunin er að skoða gamlar námur og gömul hús í þessum merka bæ sem er á lista UNESCO yfir ómetanleg menningarverðmæti. Verður gaman að sjá hvað þar er að finna:)

Bloggidiblogg - Mikið að gera

Þá er best að halda áfram þar sem frá var horfið við fréttafluttnig frá Noregi. Ég hef verið vægast sagt mjög upptekinn í verkefnavinnu í skólanum undanfarna daga og var að skila af mér lausnum í dag þ.a. nú er smá stund milli stríða. Auk þess verður þessi vika frekar róleg þar sem Hr. Sörlie er ekki með fyrirlestra í Carbon tech.

Hér er það helst að frétta að ný ríkisstjórn er að taka við völdum eftir kosningarnar í gær og Stoltenberg nokkur tekur við af Bundevik. Þetta er svona álíka breyting og að Imba Sól tæki við af Dabba digra á Íslandi, s.s sami pakkinn í mismunandi sauðagærum. Norðmennirnir voru nú ekki að kippa sér mikið upp við þessar kosningar og ég var að segja mörgum þeirra fréttir af niðurstöðunum í dag eftir að hafa hlustað á GUFUNA í morgun á netinu. Fyndið að við Íslendingar vitum oft meira um innanríkismál í örðum löndum heldur en fólkið sem þar býr og hlýtur það að segja eitthvað um fréttafýsni okkar.

Ég er kominn með sjónvarp og næ með því 18 stöðvum, norskum, sænskum og enskum. Ég er að reyna sannfæra sjálfan mig um að sjónvarpið sé besta leiðin til að læra norskuna, samviskan segir að ég noti þetta sem afsökun til að horfa á sjónvarpið:/

Svo fann ég ágæta kínverska síðu þar sem ég get horft á alla helstu fótboltaleiki í Evrópu í beinni útsendingu um netið. Ágætt að þurfa ekki að fara niður í bæ á einhverja pöbba til að fylgjast með boltanum.

Ég fékk loksins langþráðan pakka frá mömmu á föstudaginn var. Í pakkanum var að finna háskólabókasafnið mitt sem ég get ekki lifað án og ég hafði miklar áhyggjur að myndi glatast á leiðinni yfir hafið. Merkilegt hvað öll vitneskja manns og kunnátta byggist upp á því að vita nákvæmlega á hvaða blaðsíðu einhver jafna er í einhverri ákveðinni bók:) Svo var ýmislegt góðgæti sem fylgdi með frá mömmu, slikkerí (mæra upp á Húsvísku), harðfiskur og vatnssuðuvélin sem ég nota til að laga te og instant kaffi.
Ég var ekkert smá glaður að fá þennan pakka og má líkja eftirvæntingunni við að sækja hann á pósthúsið við gömlu góðu jólapakkaspennuna.

Ég ætla nú að fara að malla eitthvað í mallann. Góðar stundir.

Bubbi kóngur bara hættur

Það eru naumast stórtíðindin sem berast manni frá Íslandi í dag. Landsfaðarinn bara hættur og farinn að vinna við að telja peninga í ríkisfjárhirslunni.
Ég held að það sé nú ekki hægt annað en að hrósa Dabba kallinum fyrir góðan árangur og trygga sjórn og á hann stóran þátt í því stórgóða þjóðfélagi sem við lifum í. Annað sætið á lista Sameinuðu þjóðanna yfir lífskjör (Noregur nr.1).

Ég held að það hafi nú verið kominn tími á Davíð en hann getur vel við unað og vonandi nær hann að stjórna Seðlabankanum nógu vel til að verðbólgan verði áfram lág og að grundvöllurinn fyrir áframhaldandi velsæld, þ.e. STÖÐUGLEIKINN, verði áfram til staðar.

Þetta er samt mjög merkileg saga með þá Davíð og Geir og myndin hér að neðan sínir að þetta er ekki í fyrsta skipti sem þeir senda valdasprotann sín á milli(Davíð tók við af Geir Haarde sem Inspector Scholae í MR árið 1970).

Vonbrigði ársins - Uppselt á UEFA Champions League

Í gær var mikið um að vera hér í Þrándheimi, allavega voru símafyrirtækin að græða vel á mill 16 og 17. Þannig var að kl. 16 var opnað fyrir símasölu á þeim miðum sem seldir verða á almennum markaði á leikina þrjá í Meistaradeild Evrópu í vetur. Ég bauð tveimur félögum mínum í heimsókn til að við gætum pantað miða á leikina og setið saman Þetta væri nú kannski ekki í frásögu færandi nema vegna þess að af einhverjum ástæðum náðum við aldrei sambandi við miðasöluna, álagið á kerfið var of mikið og einhver ömurleg tölvurödd sagði okkur alltaf að reyna aftur síðar.

Við höfðum nú ekki miklar áhyggjur af þessu og héldum að aðrir hefðu átt við sama vandamál að stríða og að það væri nú nokkuð öruggt að það væru einhverjir miðar eftir á völl sem tekur yfir 21 þúsund áhorfendur í sæti. En nei, morguninn eftir þegar við reyndum aftur var okkur vinsamlegast tilkynnt að allir miðarnir væru búnir og ekkert eftir fyrir okkur :-( :+( :o( :t( :s(

Það verður því ekki mikið um Raúl, Ronaldo, Carlos, Beckham og Zidane hjá mér í vetur, en ég hef þó ekki gefið upp alla vona, við lærum það í verkfræðinni að það er ekkert til sem heitir: "ekki hægt". Ég ætla því að nýta alla mína kunnáttu og galdra til að ná í miða og ég á vona á því að það takist. Ég get allavega alltaf reddað mér miðum á leikina gegn Lyon og Olympiakos en ég finn einhverja töfralausn til að redda REAL MADRID leiknum. Við sjáum til.

Gáta

Ég heyrði þessa skemmtilegu gátu í sunnudagsþætti Hemma Gunn og ætla að sjá hvort einhver sé svo gáfaður að vita svarið við þessu. Lausnarorðið er orð sem má tengja við hverja línu vísunnar:

Í orustum hér áður fyrr
oft í skýjum séður
um stássstofunnar stoltu dyr
stundum við mig lækur kveður.

(höf. Elís Kjaran frá Dýrafirði)

Þeir sem hlustuðu á Hemma mega að sjálfsögðu ekki svara.

Heimabakaðar pönnukökur í fjallakofa

Það var rjómablíða í gær og ekki hægt annað en að fara til fjalla og skoða betur kofana sem hytteklúbburinn á og eru út um allar trissur hér í skógunum í kringum Trondheim. Svo vel villdi til að okkur Heiko (sambýlingi mínum frá Þýskalandi) hafði verið boðið í heimabakaðar pönnukökur í stóra "kofanum" sem klúbburinn á og er staðsettur í Bymark útivistarsvæðinu, sem er reyndar aðal gönguskíðasvæðið hér í fjöllunum. Við tókum strætó langleiðina upp í hyttuna og löbbuðum svo í um 10 mín upp að skálanum. Þessi skáli er nú enginn kofi, þetta er risastórt hús með mörgum örnum og gufuböðum og mjög vinsæll partístaður yfir vetrartímann þegar Nojararnir, sem eru algerir skíða-terroristar, koma heim úr gönguskíða dagsferðunum sínum.

Við fórum í gönguferð um svæðið í kringum hyttuna og nutum veðursins til hins ítrasta. Norðmenn hafa nefnilega sama hátt á og við Íslendingar þegar kemur að góðu veðri og þeir orða þetta atferli sitt á eftirfarandi hátt: "we dont want to spoil the weather" eða "við viljum ekki að veðrið fari til spillis":) Hér eru því allir utandyra um leið og smá sólarglæta sést á himnum.

Eftir göngutúrinn var sest að snæðingi og var boðið upp á norska grænmetissúpu og síðan heimabakaðar pönnukökur með sultu eða sykri, namminamm. Við gistum nú ekki í þetta sinn en við munum heimsækja hytturnar oftar í vetur og jafnvel enn frumstæðari útgáfur af þessu kofum sem kallast kojer og eru kofar án rafmagns eða annarra þæginda.

Við Heiko í strætó á leið til fjalla
Hytte. Þetta er nú bara glæsilegt hús með öllum þægindum
Með John Chiles frá Misouri (USA) að borða súpu og bíða eftir pönnukökunum

Langir fyrirlestrar og langar gönguferðir

Púff, hvað skal segja eftir svona daga?

Við Heiko fórum í gönguferð upp í skógarhlíðarnar í blíðviðrinu seinnipartinn til að róa okkur niður eftir fyrirlestralotu dagsins. Það eru komin þessi fínu bláber sem bragðast alveg eins og þau íslensku og við vorum nokkra stund að gæða okkur á þeim. Við hittum nú ekki fyrir neina birni eða elgi í þetta skiptið og var mikil kyrrð og ró yfir öllum skóginum og gott að slaka aðeins á:) Upphafið af þessari ferð okkar var löngun til að rétta við þær fáu heilasellur sem lifðu af fyrirlestrana í dag. Við vorum frá 8:15 í morgun í samfelldum fyrirlestrum til 15:00 og þar af 4 klst. í Kolefnistækni, vei vei. Og eftir 4 klst. af samfelldri kennslu ætlaði prófessor Dr. Morten Sörlie varla að geta hætt að tala um efnið, svo áhugasamur var hann um þetta, jesús. Þess má geta að við Morten verðum samstarfsmenn hjá Alcoa, en Morten starfar að hluta til sem verkfræðingur hjá ELKEM (sem er 50% í eigu Alcoa) í Kristiansundi.

Ég ætla nú ekki alveg að drepa alla úr leiðindum með þessu tæknitali mínu en ég verð nú bara að skjóta hérna inn titli á einu viðfangsefni sem við vorum að fjalla um í kúrsinum Mechanical Properties of Metals - ísl: Burðarþolsfræði málma, titillinn var s.s. Elastic-Plastic heterogeneous plastic homogeneous respons.... hvað er eiginlega hægt að búa til fræðilega titla á mjög einföld fræði???

Nú er ég loksins að fá í hendurnar nemendakortið mitt og get því farið að skrá mig í klúbba hér við skólann. Hytte-klúbburinn er sérstaklega áhugaverður og gefur tækifæri til að kynnast norskri menningu og norsku fólki. Hytter eða kojer eru semsagt svona fjallakofar sem eru út um allt hér í fjöllunum í Noregi og notaðir sem afslöppunarstaðir og samkomustaðir. Hytte-klúbburinn á u.þ.b. 40 svona kofa/bústaði og skipuleggur ferðir í þá um hverja helgi og getur maður þá tekið hjólið með eða bara labbað frá rútunni í ca. klukkutíma upp í þessa kofa. Þarna er sauna til staðar og allt mjög frumstætt, t.d. þarf að höggva til eldivið til að hita upp húsin.
Ég segi betur frá Hytte þegar ég fæ að kynnast þessu af eigin raun en þetta er allt mjög ævintýralegt.

Ætla nú að fara að halla mér en ætla nú að hlusta á eitthvað íslenskt gamalt og gott áður en ég dett alveg útaf, t.d. sálmaplötu Ellenar Kristjáns. sem er alveg rosalega skemmtilegt og gott safn af klassískri kirkjutónlist í nýstárlegum búningi. Mæli með henni á ipod(inn):)

Laundry, piece of cake

Þessi þvottur er nú ekki mikið mál. Þetta er nú bara spurning um að flokka eftir litum og efnum og svo ýta á nokkra takka og setja inn og taka út úr vélunum. Ég er nú bara nokkuð stoltur af því hversu fljótur ég var að ná þessu:)

Svo er nú matargerðin ekki mjög flókin, merkilegt hvað fæst mikið af tilbúnum mat í búðunum. Ég steikti mér t.d. rauðsprettu í raspi einn daginn og hún var bara hreinasta afbragð, næstum jafn góð og ýsa í raspi að hætti mömmu. Svo er pastað mjög vinsælt og ódýrt námsmannafóður. Maturinn hér er mjög líkur þeim íslenska. Hér er hægt að fá þorskalýsi, jógúrt og osta sem eru alveg eins og á Íslandi. Svo eru þeir mikið með síld á boðstólnum og einnig staðvært dýrakjöt eins og elg og hreindýr. Svo er kaffið mjög visælt hér í Noregi og hef ég sjaldan séð álíka kaffiþambara eins og þessa Nojara sem ég þekki hér. Andreas, sambýlingur minn, kom einmitt með þessa svakalegu kaffimaskínu (lagar espresso, venjulegt kaffi og svo videre) hérna í íbúðina til að vera alveg viss um að fá sinn fasta dagskammt. Ítalarnir hérna skilja ekkert í þessari kaffimenningu og kalla kaffið sem við drekkum "kaffidjús", enda er það frekar þunnt m.v. ítalska espressokaffið sem ég hef smakkað hér, skot beint í heilann og manni svimar við að drekka það.

Jæja, nú hætti ég að rasa og ætla að fá mér einn kaffibolla til að taka þátt í menningunni hér:)

Helginni lokið og alvaran tekur aftur við:/

Ágætri helgi lauk í gærkveldi með vídeoglápi hjá Magneu og Jónasi og var vísindaskáldsagan "island" á dagskránni. Mjög athyglisverð mynd um fyrirtæki sem ræktar klón af ríku fólki og selur þeim svo líffæri úr klónunum. Minnti svolítið á skáldsöguna Brave New World sem maður las hér forðum daga í Menntaskólanum.

Mér var boðið í mjög fjölþjóðlegt dinnerpartí á föstudaginn hjá matarklúbbnum. Deepball frá Singapur hélt uppi stuðinu að vanda og reitti af sér brandarana og svo kom Janet frá Þýskalandi með þennan frábæra hlaupeftirrétt. Reglurnar í eftirréttinum voru þær að aðeins mátti nota sogrör við átið og var mjög athyglisvert að fylgjast með fólki sjúa fullar skálar af hlaupi upp með röri og heyra hljóðin sem fylgdu með.

Í dag þarf ég að velja mér fyrirlestrarefni sem ég þarf að stúdera fyrir fyrirlestur sem ég á að halda í áfanganum Carbon Technology (Kolefnistækni). Þetta er semsé heill áfangi sem fjallar um kolefni, kolefniskeðjur, grafít, demanta, kox og allar þær afurðir sem hægt er að framleiða úr kolefni (mjög athyglisvert verð ég að segja).
Ég þarf víst að drífa mig í fyrirlestur í Heterogeneous Equilibriums, varmafræði og orkuferlar málma:)

Hér eru nokkrar myndir frá Moholt Studentby (stúdentagörðunum mínum):

Mjög skemmtilegt hverfi

Húsið mitt-Mohot Alle 10

Oh, so you are not a Norwegian!!!

Þá get ég loksins haldið áfram að blogga. Vandamálið undanfarna daga hefur verið að veðrið hefur verið mjög gott og svo hafa þessir skemmtilegu kerfisstjórar verið að loka fyrir internettenginguna mína af og til vegna skorts á "windows security updates" (Nojararnir eru mjög nákvæmir og regluhlíðnir og fara eftir öllum lögum og reglum sem gilda og því þarf ég að vera duglegur að halda öryggisbúnaði tölvunnar í lagi).

En áfram gakk. Ég fór semsé í þessa frábæru siglingu á Þrándheimsfjörð á laugardaginn (sjá myndir) og skoðaði m.a. gamlan síldarbæ, svona Sigló Noregs, sem heitir Uthaugen. Ferðin tók 6 tíma og var sérstaklega skemmtilegt að fræða vini frá Afríku og mið-austurlöndum um sjó og siglingar og veðurfar hér á norðurhjaranum. Margir þeirra höfðu "aldrei" áður farið á sjó og hvað þá í svona nöprum vindi eins og var þennan annars ágæta dag.

Ég hlýt að líta út eins og sannur Norðmaður því fólk er alltaf að tala norsku við mig þegar ég er úti á götu eða í búðinni. Ég reyni aðvitað að babbla eitthvað á móti á minni hræðilegu dönsku, sem gegnur þó stundum bara merkilega vel. Fólk virðist samt alltaf jafn hissa þegar það heyrir að ég tala ekki norsku en verður mjög vingjarnlegt og áhugasamt þegar maður segist vera frá Íslandi. Ég held að Norðmönnum þyki þrátt fyrir allt mjög vænt um okkur Íslendinga, svona svipað viðhorf og við höfum gagnvart Færeyjingum;-)

Skólinn byrjaði á mánudaginn með fundi hjá prófessor Trygve Foosnæs, sem er svona einskonar idol áliðnaðarins og mjög þekktur í bransanum. Við náðum náttúrulega mjög vel saman og hann er sérstaklega áhugasamur um þennan díl sem ég er á hérna í skólanum. Hann gerði mig að hópstjóra fyrir alþjóðlegu nemendurna og ég mun því vera mikið í samvinnu við hann í vetur.

Svo hefur vikan liðið og hver nýr prófessorinn af öðrum byrjað að kenna og lýst mér mjög vel á þessa menn. Þeir eru flestir mjög færir á sýnu sviði og sem dæmi um það er að flestar kennslubækurnar sem við notum eru eftir prófessora hér við skólann en eru samt sem áður á ensku og seldar um allan heim.

Og svo er það ROSENBORG:)!!!! Rosalegur leikur gegn Steaua Bucarest á Lerkendal Stadium endaði 3-2 fyrir RBK (sjá myndir). Við Jochen vorum alveg að fíla okkur með Rosenborg stuðningsmönnunum og vorum farnir að syngja á norsku án þess að vita af því. Við erum semsagt komnir í meistaradeild Evrópu og drógumst í riðil með spænska risanum Real Madrid hvorki meira né minna. Ég held að ég reyni að tryggja mér miða á þann leik eins fljótt og auðið er.

Hjólið er komið í hús. Mongoose með öllum nauðsynlegum aukahlutum. Núna verður hægt að sofa 10 mín. lengur á hverjum morgni:)

Skráning mín inn í gagnagrunna skólans er nú á lokastigi og ég er kominn með lykilkort af byggingum og nýtt e-mail veffang: einarsso@ntnu.no eða sigurdur.agust.einarsson@material.ntnu.no . Ég er með vinnuaðstöðu í stofu mastersnemanna og lítur það allt mjög vel út. Við fáum svo nýjar skrifstofur í nóvember þegar viðgerðum á húsinu okkar verður lokið og það verður víst mjög góð aðstaða þar bæði til lestrar og rannsókna.

Þetta er nú bara ágætt í bili. Matarboð og partí á morgun hjá Magneu og Jónas og jazztónlekar og áframhaldandi partí í Samfundet fram eftir nóttu.

Með kvef- og hóstakveðju frá Niðarósi... Sigurd (Sigurður, oh, a very strong name)

Dansiball í sirkustjaldi

Ég lennti á þessu svakalega djammi í gær. Eftir að hafa kíkt á nokkra af kjallarabörunum hér í Moholt þá lá leiðin í partý hjá þýskri stelpu sem býr hér á görðunum og voru þar samankomnir nýjir vinir, mest frá norðurlöndunum þó, og var mjög fín stemning. Eftir það lá leiðin í "Samfundet" sem er svona svipað fyrirbæri og Háskólaráð heima en hér er þetta aðeins stærra batterí því Samfundet á líka samnefndan háskóla-skemmtistað sem er bara flottasti klúbbur sem ég hef komið inná. Staðurinn er á fjórum hæðum með börum, dansgólfum og sölum á hverri hæð og á efstu hæðinni er stór salur sem er eins og sirkustjald, stórt kringlótt dansgólf og stúka allan hringinn og hvít-rauð röndótt hvelfing fyrir ofan, mjög spes staður sem svipar dálítið til Sjallans á Akureyri en er bara svona 5 x stærri.

Í dag var kynning á hinum campusnum hér við NTNU. Sá heitir Dragvoll campus og er staðsettur aðeins fyrir utan miðborgina. Í Dragvoll eru kenndar allar greinar sem ekki eru tengdar raunvísindum og verkfræði. Þær greinar eru nú reyndar ekki mjög margar en þær helstu eru íþróttafræðigreinar, sálfræði, læknisfræði, félagsvísindi, kennslufræði, arkítektúr og listir. Hér að neðan sjást myndir frá Dragvoll:

Dragvoll. Mjög smekkleg hús og allt umhverfi til fyrirmyndar

Smá sólbað með norðurlandabúunum

Á leiðinni heim frá Dragvoll rákumst við á hús íslenska ræðismannsins í Þrándheimi. Við Íslendingarnir vorum náttúrulega mjög stolltir yfir að Ísland skuli vera svona sýnilegt í borginni og létum að sjálfsögðu taka mynd af okkur þar:

The Empire of Iceland. Með Magneu og Jónasi.

Það verður bara rólegt kvöld í kvöld enda nauðsynlegt að hvíla lúin bein eftir stranga viku. Á morgun er svo dagsferð á báti út á Trondheims fjord með mat og öllu.

Bara svona til að þið vitið það þá var 22°C hiti hér í dag og ekki ský á himni og vona ég að það verði svona áfram fram á haustið.

Yfir og út.

Full program - nóg af partýum

Þá er maður byrjaður að komast inn í hlutina hérna í NTNU. Síðustu tveir dagar hafa farið í praktíska hluti eins og fyrirlestra og fundi með prófessorum og öðru starfsfólki skólans. Svo hefur ekki vantað upp á partý og skemmtanir því það hefur verið mikil dagskrá á hverju kvöldi bæði með Masters-nemunum og einnig með alþóðasamfélaginu hér í skólanum.
Í dag var mikil hátíð í skólanum, skólasetningin var í morgun og var mikið um dýrðir, hljómsveitir, söngvarar, dansarar, ræðuhöld og kynningar á þeim 80 klúbbum sem starfa við skólann. Starfsemi þessara klúbba spannar nánast allt sem hægt er að hugsa sér frá fjallaklúbbum til tónlistarklúbba. Það var barbeque grill í hádeginu fyrir okkur útlendingana og svo var kynning á nemendafélögunum sem starfa við hverja deild. Ég get valið um tvö félög til að vera í Smörkoppen eða Bjerg og ætla ég að sjá til hvort ég vel þangað til ég verð búinn að hitta norsku samnemendur mína. Þessa stundina eru að byrja öl-partý í hverjum kjallara hér í Moholt stúdentagörðunum, en hvert nemendafélag á sinn kjallara þar sem það rekur bar og heldur sínar skemmtanir. Ég held ég skelli mér í kjallarann hjá Bjerg í kveld.
Ég er búinn að hitta par frá Íslandi sem býr hérna rétt hjá mér og ég vissi að væri að koma hingað. Strákurinn var með mér í kúrsum í HÍ þannig að ég þekkti hann aðeins frá fyrri tíð. Ágætt að hafa einhverja Íslendinga til að spjalla við á síðkvöldum í vetur.
Svo er ég búinn að hitta tvo af þremur Norðmönnum sem munu búa með mér í vetur. Þessir strákar virðast vera mjög fínir svona við fyrstu kynni og er ég mjög ánægður með þá.
Ég hef ekki tíma fyrr en um helgina til að uppfæra myndasíðuna mína en ég læt samt fylgja með nokkrar myndir svona til að það sé eitthvað að sjá frá Noregi.

Félagar frá Þýskalandi, Slóveníu, Ítalíu og Frakklandi

Skólasetningin á grasinu fyrir aftan gömlu aðalbygginguna

Einn af mörgum fyrirlestrum þessa vikuna

Kynning með formanni nemendafélagsins Bjerg (flottur búningur sem hann er í)

Loksins tengdur í Noregi:)

Jæja þá getur maður byrjað að blogga af alvöru.
Ég veit bara ekki hvar ég á að byrja enda af mörgu að taka og ótrúlega mikið sem á daga mína hefur drifið síðan ég yfirgaf Keflavík á föstudaginn.
Til að byrja með þá ætla ég nú bara að segja frá hversu frábært umhverfi og frábær aðstaða er í boði hér við NTNU, Norwegian University of Science and Technology. Ég á varla orð til að lýsa Glöshaugen campusinum sem er aðal-háskólaþorpið í NTNU (þar sem ég mun stunda mitt nám). Það er sérstök bygging fyrir hverja grein innan verkfræðinnar og raunvísindanna og þær eru sko ekkert slor. Nýjasta húsið er Náttúrufræðihúsið og það er líkara einhverju nýtískulistasafni heldur en kennsluhúsi. Main building er elsta byggingin og er hún u.þ.b. 100 ára gömul í kastalastíl, minnir mjög á skólahúsin í Cambridge í Englandi. Svo eru litlar götur, hjólreiðastígar og gangstéttir millri allra húsa og allsstaðar tré og grasfletir fyrir fólk til að liggja á og lesa eða gera það sem hentar hverju sinni.
Íbúðin sem ég leigi í vetur er í Moholt studentby sem er staðsettur rétt fyrir ofan Glöshaugen campus. Ég misskildi nú eitthvað upplýsingarnar sem ég fékk sendar til Íslands um íbúðina því þetta er eiginlega meira svona einskonar kommúna, þ.e. fjögur mjög rúmgóð og vel standsett einstaklingsherbergi með sameiginlegt miðjuverelsi, þ.e. eldhúsi og baði. Þetta lítur allt mjög vel út og hér er allt til alls, uppþvottavél og allur eldhúsbúnaður sem á þarf að halda. Ég er ennþá einn í íbúðinni og á því von á að þetta séu þrír Norðmenn sem ég mun "búa með" og er það ágætt uppá að læra að tala málið svona í byrjun.
Ég er búinn að vera síðustu 2 daga í Orientation Week og þar hefur margt skemmtilegt verið í gangi:) Hér er fólk allsstaðar að úr heiminum og ég er búinn að kynnast alveg ótrúlega mörgum á þessum tveimur dögum. Meðal þeirra er fólk frá Þýskalandi, Frakklandi, Spáni, Ítalíu, Nepal, Pakistan, Ghana, Eþjópíu, Úganda, Kazhakstan, Slóveníu, Hollandi, Ástralíu, Suður-Kóreu og svo videre. Fólkið frá þriðjaheimsríkjunum er flest á sérstökum þróunarhjálpar-styrkjum og er alveg sérstaklega kátt og skemmtilegt. Svo eru hér inn á milli "olíufurstar" frá Pakistan, Kazhakstan og Afríkuríkjum sem eru á styrkjum frá stórum olífyrirtækjum og koma hér til að læra Olíuverkfræði hjá Norðmönnunum.

Um bæinn:
Trondheim kemur virkilega á óvart og þetta er greinilega gömul höfuðborg ef tekið er mið af öllum flottu stjórnarbyggingunum í miðborginni. Hér er ótrúlega mikið af gömlum húsum, kirkjum, kastölum, bryggjum, torgum og görðum. Um helgina var bærinn vægast sagt iðandi af mannlífi, götumarkaður með grænmeti og skrani, götuleikhús, hljóðfæraleikarar á hverju horni og mikið af kaffihúsum og búðum í hæsta gæðaflokki. Ég var nú aðallega í leit að bar þar sem enski fótboltinn væri á dagskrá og ég fann einn enskan bar "Kings Cross" í gamalli kastalabyggingu og þar gat ég sest niður með norskum félögum í Manchester United og horft á leikinn sem endaði að sjálfsögðu með sigri 2-0.

Ég er þessa stundina að leita mér að góðu reiðhjóli sem stenst öll veður og þá eru mér allir vegir færir hér í þessum frábæra bæ.

Ég þarf að kveðja að sinni þar sem ég er að fara í Dinner með International M.Sc. Students í boði skólans í Marine Technological Center ( skipatæknimiðstöðinni) og svo er örugglega eitthvað partý á eftir:)

p.s. ég á eftir að taka fullt af myndum sem munu birtast hér á síðunni innan skamms.